Extra – 17 juni 2013
WILLEMSTAD.- Fundashon Bicentini ta konta ku sosten di Sunscape Curaçao Resort & Spas di manera ku na momento ku Remco Bicentini i su ‘crew’ ta na Kòrsou pa nan proyektonan riba tereno deportivo i sosial, nan por ta trankil ku e hospedahe. Fundashon Bicentini pa 5 aña kaba ta hasi trabou balioso pa e hubentut ménos pudiente di Kòrsou. Gerensia di Sunscape (ántes Breezes) ta di akuerdo ku e meta di Fundashon Bicentini ku ta mustra ku hóbennan mester haña un oportunidat den bida. “Komo ku Sunscape Curaçao tur aña ta sostené nos ku hospedahe, nos por konsentrá riba nos meta ku ta mustra ku salú i komportashon di muchanan mester ta sentral. Muchanan ku ta move poko pa motibu di muchu peso i tambe otronan ku ta menasá di subi kaminda robes, ta asuntunan sosial ku mester di atenshon”, segun Remko Bicentini. Di un banda ta stimulá e muchanan pa hasi deporte i hiba un bida saludabel, pero di otro banda ta konsientisá e muchanan ku nan mayornan riba nan responsabilidat pa ku komunidat, segun Bicentini a duna di konosé.
